บทซอไหว้ครู
ประพันธ์โดย แม่ครูลำดวน สุวรรณภูคำ
จะยกมือไหว้ขันแก้วตังสาม พระพุทธพระธรรมพระสังฆเจ้า
จะยอมือสาวันตาน้อมเกล้า อันนี้เป๋นเก๊าของศาสนา
จ้วยกั๋นกราบนบเคารพไหว้สา องค์พระสัมมาสัมพุทธเจ้า เป๋นฮ่มเป๋นเงาอยู่ใต้ลุ่มฟ้า
จะยกมือไหว้ครูบาอาจารย์ และดวงวิญญาณอาจารย์เก๊าเหง้า
บ่ว่าครูป๋ายครูต๋ายครูเก๊า หื้อหลั่งไหลเข้ายังทิพมนต์
ตี่อยู่จั้นฟ้าหยาดมาเหมือนฝน หื้อได้มาดลจิตใจ๋แห่งข้า มีผญ๋าปั๋ญญาไหลมาดั่งน้ำ
ยอมือสิบนิ้วก่ายกิ้วเกศา หาเตวดายังสวรรค์จั้นห้อง
กันได้ยินเสียงสำเนียงน้องฮ้อง หื้อสนั่นต้องถึงเทพปลายบน
เตวาอาฮักษ์ฮู้หันทุกต๋น สะป๊ะปลายบนทุกหนแห่งห้อง หื้อได้ไปถองเก้าห้องจันฟ้า
ลูกขอสุมมาเจ้าตี่เจ้าฐาน วัดวาอารามสามดวงแก้วเจ้า
บัดนี้ลูกหลานได้มาเริ่มเก๊า ขอสาน้อมเกล้าถวายบังคม
อย่าหื้อเป๋นบาปอย่าหื้อเป๋นกรรม สิ่งตี่มัวดำอย่าได้มาใกล้ จุ่มอกจุ่มใจ๋พร้อมเจ้าปี้น้อง
สิ่งใดผิดพลาดขออโหสิกรรม จิกรรมมโนกรรมอย่าได้มาใกล้
นาบุญสมปานบันดาลจ้วยไว้ เจิญพระเจ้าแก้วศรีรัตนตรัย
ขอหื้อปี้น้องจุ่มเนื้อเย็นใจ๋ อยู่สุขสบายต่อนี้ไปหน้า สมผาทนาเหมือนกั๋นปี้น้อง
ความคิดเห็น
แสดงความคิดเห็น